CIUDAD SANG ILOILO. Ang Philippine Health Insurance Corporation nagpanghanda sa pagpagwa sang detalye angut sa igalunsar kag iga-implementar nga bag-o nga pamaagi sa pagbayad sang benepisyo.
Ini nahanungod sa bag-o nga standardized set sang reimbursement o ginatawag nga “case payment” para sa 22 ka mga common medical kag surgical cases nga ginabulong sa mga balay bululngan sang mga miyembro kag dependents sang Philhealth.
Ang bag-o nga mga packages ang una na nga gin-anunsyo mismo ni PhilHealth President kag CEO Dr. Rey B. Aquino kadungan sa pagselebrar sang National Health Insurance month sang Febrero 2011.
Kalakip sa 11 ka mga kaso medikal ang dengue 1 kag 2, pneumonia 1 kag 2, essential hypertension, cerebral infarction kag hemorrhage, acute gastroenteritis, asma, tipos ukon typhoid fever, kag newborn care package.
Samtang sa surgical cases naman nalakip nga pagtratar paagi sa radiotherapy, dialysis, normal kag caesarian section nga pagpanganak, appendectomy, cholecystectomy, hysterectomy, dilatation kag curettage, thyroidectomy, herniorrhapy kag mastectomy.
Pinaagi sa bag-o nga package, indi na mabudlayan pa ang mga pasyente sa pagpalamangkutanon kon pila ang igabuhin sa ila balayaran sa ospital bangod klaro kag may pat-ud nga kantidad nga bayad ang Philhealth sa tagsa ka kaso santo santo sa masakit o procedure nga ginpatigayon sa mga Philhealth accredited facilities kag doctors. (Larry Tabsing, Public Affairs Unit)
