PHILHEALTH DESKS SA ESTANCIA, GUIMBAL GINBUKSAN

Ciudad sang Iloilo. Ginakalipay sang mga PhilHealth members nga nagapuyo sa southern kag northern part sang Iloilo bangud may PhilHealth Service Desks na sa banwa sang Guimbal kag Estancia, Iloilo.

Bangud sini, indi na kinahanglan pa maglakat sa ciudad sang Iloilo ang may tuyo sa pagpadulong sa Philhealth office .

Ang Guimbal Service Desk napahamtang sa Senior Citizen’s Building nga ara gid lamang sa kilid sang Pedro Trono Memorial District Hospital (Guimbal Distrcit Hospital).

Samtang ang Estancia Service Desk napahmatang naman sa entrance section sang Mercado Publiko sang nasambit nga banwa.

Ang amo nga mga PhilHealth Desks nagatalupangud sang mga kinahanglanon sang mga PhilHealth members kag dependents nga nagapuyo palibot kag malapit sa amo nga kabanwahanan agud magpaupdate sang ila Member Data Records o magpalab-ot sang ila pamalangkutanon.

Ginpahayag ni Marilyn Geduspan, PhilHealth Regional Head nga ginbuksan ang ining mga PhilHealth DESKS bilang kabahin sang pagsaulog sang National Health Insurance month.

May PhilHealth personnel nga naga-asikaso sang amo nga mga opisina sa tagsa ka Martes sa Estancia kag kada Jueves naman sa Guimbal.

Ang iban pa nga PhilHealth Service Offices sa Iloilo ara sa Sara, Passi City kag ang mayor nga PhilHealth Members Assistance Center (PMAC) sini nga yara sa PhilHealth Regional Office, sa J de Leon St., Iloilo City. (Larry Tabsing, Public Affairs Unit)